اشراف اجدادك
وواخد رضا الاقطاب من ميلادك
عن طريقهم ما شى زايف حادك *** لا مال لا سلطة عناها شايل
اللى الناس يطغوا به تواضع زادك *** للخير والسخا والعطف ديمة مايل
خلاّك منشرح حتى اوقات نكادك *** طيب اصل من جدك وطيب خصايل
لسانك نقى طاهر مثيل فوادك *** لا اتحب عيب وعيب تنهر سايل
واجهت جيش ايطاليا باجوادك *** وكافحت صولات العنيد الصايل
لكن عداده جت اضعاف اعدادك *** والعون كان راقد والسنين كلايل
هاجرت وين الوقت ضام افرادك *** وجيش العدو تمّا سلاحه هايل
من حاشن اللى عاداك موش اندادك *** الهجرة طريق اللى شريف اصايل
لبلاد الهنا والخير ربى قادك *** وفيها مضيت سنين ميش قلايل
لكن اتفكر فى مصير بلادك *** اللى بات الاستعمار فيها دايل
وهى دايما بين الغطا ووسادك *** ايجيك اسمها ساعة النوم ايخايل
ايجيك اسمها ساعة النوم ايخايل *** ووين قابلت فرصة علنت جهادك
وكوّنت من جيش البلاد فصايل *** مع حليف له غاية نهضت بلادك
وزاحيت عنها سوط فيها عايل *** ومن خيار ناساتك عمر ميعادك
وانهالت لتأيدك اكوام رسايل *** وبعض الدول فيها سمر حسّادك
بيش يزرعوا لك فى الطريق شتايل *** ووين الانجليز لشى ثانى رادك
جاهرت رايك ما نويت اتحايل *** على ما كلام وهول منهم صادك
ما رضيت لحقوق البلاد بدايل *** ووين هادنوك مشيت فى ملهادك
الناس واخذة رايك وباعك طايل *** وصار كم جيل وجيل تحت ارشادك
سوى وانت فى منفاك والا دايل *** وكثرن على طول الزمان اودادك
سرى الخير والبترول تمّا سايل *** ووين ما جنوا غرسك جفوك اولادك
واللى جفوك ما منهم اتريد جمايل *** ولا تريد تاذيهم تركت بلادك
من غير العصا والجرد مانك شايل *** وقلت ياللى يبقوا ضناك اضدادك
خاسر سوا دالوك والا دايل *** ما تريد تحمى دولتك بزنادك
ولا اتريد دم عزيز يبقى سايل *** الجور لو سلاحك لا سلاح اجدادك
والجور لو بقى مدة مصيره زايل *** سلاحك كلام الحق فى ميعادك
ولا سلاح غير الحق عمره طايل *** شريف ومشيت شريف ربى رادك
وما ايحول دون احكام ربى حايل *** لمصر العزيزة حكم عالى عادك
انت تحب هلها والقلوب دلايل *** ووين ما اعتليت العرش وكثر زادك
رديت الجميل اضعاف ضعف الكايل *** جمال اكرمك واكرام خلفه زادك
وروس العرب تكرم الضيف الجايل *** وتمّوا رجال الدين هم روّادك
لا مال لا سلطة عليها سايل *** عارف مثيل العارفين اجدادك
المال والزها والجاه كله زايل *** راسخات فى ساحة الدين اوتادك
طيب قلب ومروّة وطيب فعايل *** عفيف ما تقول العيب فى ميعادك
ولا ان جاك عيب اتبادله بمثايل *** الناس تعرفك وانت نزيل امهادك
نين فتت تسعينك وعمرك طايل *** ما جبدك يوم بخاطية جبّادك
ولا عمرهم شدّوا عليك زلايل *** توعد وديمة صادقات اوعادك
لا اتخون فى عهدك ولا تذّايل *** اتجيه وين يضايق الشعب اعتادك
بافكار نيّره تضوى الليل اللايل *** ان عاندوك فى دينك صعيب عنادك
وان سالموك ما قلبك ايشيل غلايل *** هيّن ان جاك ضعيف ياخذ زادك
وان جاك القوى يقنع بطيب شمايل *** اتساعد وديمة للضعيف سعادك
افعالك اتجى لغارقين نشايل *** ايحول الكدر بينك وبين وسادك
ان كان ريت ميزان العدالة مايل *** كريم فى افعالك والكريم افادك
صارت ايامك للصلاح دلايل *** ماشى عن درب العروبة حادك
وفى اصلاح ذات البين باعك طايل *** حتى لو عليك ايزايدوا حسّادك
الحق نور ما يخفيه قولة قايل *** ان قالوا نفوك النفى قيمة زادك
والنفى فى كبارالشان ديمة عايل *** وان كان سمموك الله تحيا رادك
وعشت نين خليّت الظلام شعايل *** وان كان خلعوك الخلع زاد امجادك
الناس ادركت مالك هناك مثايل *** ون كان بدت فى ساحة الخير بيادك
فاعل ومرشد للصلاح وقايل *** ون كان حاولوا بالزور طمس جهادك
التاريخ واضح ما ايعوز دلايل *** وان كان ابعدوك لمصر صار بعادك
وباع مصر م الابطال يامو شايل *** وانت ومصر من سابق ايام جهادك
كان بينكم متبادلات جمايل *** امنين ما جيوش الغازيين تمادت
وصارت مغاوير الجهاد فلايل *** الهام جاك من ربك الهجرة نادت
وما فيه للالهام الكريم بدايل *** قصدت ناس ما تجهل اهداف اقصادك
سبّاقين للزينة بكل فعايل *** رجال الكنانة رحبوا باوفادك
وفؤاد جاك مندوبه البشرى شايل *** عارفين بوك وعارفين اجدادك
نزلت بينهم وكانوا خيار نزايل *** وعشت فى هنا ما كيد كايد كادك
ولا ريت من فضل الكريم غوايل *** حتى ايطاليا كى طالبت باردادك
لا وافقوا لا سايروا الدخايل *** وهبّت صحافتهم تريد انجادك
وماتريد يوخذ فيك قول محايل *** وياما سعوا لوتاك واستعدادك
مشاهير مصر اللى عناها طايل *** منها وفيها خير واجد صادك
ايام هجرتك من غزو فاشى صايل *** ومنها وفيها شع نور جهادك
ايام حرب دولى والجيوش قتايل *** ومنها وفيها بادروا باسنادك
نين درت للجيش الحديث وسايل *** ومنها لوطنك جيت فى ميعادك
وصار دحر جيش ايطاليا النعايل *** وارسيت وضع دولة فى ربوع بلادك
عفيفة شريفة وافية الخصايل *** ايام فقرها ياما بنا شيّادك
مشاريع تشهد لك بمانى قايل *** والناس معتبرها فى مكان اولادك
مانك لواحد دون واحد مايل *** واموال ليبيا فاضت بفيض ارشادك
وعلى صونها تعمل بكل وسايل *** وبقى الشعب رايض فى نعيم اودادك
نين فى فساد الجون عال العايل *** امنين ما وضح للمسلمين اسعادك
وما قدعك عن مبداك راى محايل *** صار فى الخفا حلف الصليب اضدادك
ومعاه كل من للمال ريقه سايل *** وابقى السوس ينخر فى شباب بلادك
اللى قبل ياما لك عليه جمايل *** القيت السعادة فى طريق اجدادك
وايام السعادة فى الحياة قلايل *** نويت تنزوى واتعيش بين اورادك
الا الفانية مانك عليها سايل *** تركن مملكة والترك كان مرادك
عليه من ثمان سنين وانت عايل *** ومشيت ملتزم بالصمت كى عاداتك
لا تلوم لايم لا تعاتب قايل *** لا خذت حاجة من اثمار جهادك
امفيت ما عصاتك تحت باطك شايل *** عفيف ملتزم مشهور بين اندادك
قنوع من لذيذ العيش مانك نايل *** سافرت م الدنيا وتاك وزادك
التقوى اللى ربك عليها قايل *** زرعت خير تلقى خير تحت الحادك
لو زرع شوك ولو بذار نجايل *** لا تلطّخت يدك بدم اولادك
ولا دمّعت منك عيون حلايل *** فى مسيرتك ديمة انظاف اسنادك
لا لف لا دوران لا اتحايل *** ايام الوفا ما فعل رايع كادك
ولا شغلك عن خوض الجهاد شغايل *** واليوم م الدنيا وفا ميعادك
وصارت وجوه الطيبين قلايل *** حتى ان بدت فى طاعة الله بيادك
وفى طاعة الله البياد فضايل *** اللى قضى من عالم الفوضى حادك
قوى لا ايخاف ولا عليه انحايل *** بعد دعاك فى لحظة سلمت قيادك
لابواب السما وانت هنى متفايل *** الموت فى شهر شعبان ربى زادك
وشوق فى حياة افضل مداها طايل *** ويوم ميتتك خيّم ظلام بلادك
وصارت دموع رجالها تسّايل *** اللى قبل كانت عامرة بامجادك
حتى غزالها العيوف راح جفايل *** بعيد متت عن ناسك ووطن اجدادك
غريب والغريب شهيد ميزة نايل *** ومصر العظيمة كم عام اواتك
وفيض خيرها ياما عليك تهايل *** ومبارك بعد جاته اخبار وفاتك
قال يندفن دفنة امجاد اصايل *** لكن التربة للبقيع دعاتك
وتنفيذ الوصية فرض وانت قايل *** طيارة مبارك بالحرس شالاتك
شور وطن ما غيره تريد بدايل *** فى مكان طاهر م الدنس حطّاتك
قريب م الرسول اللى شريف اصايل *** وفى جوار بوها فاطمة دفناتك
عليه وعليك دموعها تسّايل *** صاحبة جلالة ما نهار جفاتك
ولا تمايلت وين الزمان تمايل *** الله يرحمك والله يكرم ذاتك
ما نعرفوك الا بطيب خصايل *** قضيت عمراوفيت فيه حق بلادك
ما ينتسى عامر بكل فضايل *** واليوم صار من دار الزوال بعادك
ودار الزوال اللى عليها زايل *** حتى لو زهت فترة وطال قعادك
معوال هدمها ف الناس ديمة عايل *** واللى وراك ينعوا فيك فى مسقادك
واويصوا ان شافوك الوصايا شايل *** انكان ريت ف الفردوس بعض اريادك
حاول اتخاطبهم بكل وسايل *** قول لصلاح الدين طال رقادك
وجيش الصليب بعدك جانا صايل *** اسرابه اتصول اتجول فى ملهادك
وجيوش العروبة من بعيد اتخايل *** وقول للشريف احمد اثمار جهادك
كلوها اللى جو للبلاد دخايل *** واصحاب الوفا والصابرين اولادك
اليوم فى صغا والوقت بيهم مايل *** فقارا وخير بلادهم وبلادك
يامانهب ناهب وشال الشايل *** وقول ياعمر مختار وين جوادك
من يوم غاب ما بانت خيول اصايل *** اللى هو صواريخك وهو طرّادك
صهيله ايرد الغازيات جفايل *** وزيد قول له ياشيخ وين عضادك
اللى ف الصفوف الزاحفات اوائل *** اللى ان جت جيوش عداك فى مرصادك
ايجى رصاصهم كيف الشبوب الهايل *** واليوم وين، ما عنهم نشد نشّادك
ولا عقبهم يسأل عليه السايل *** من غير صورتك وانت اتجر اصفادك
ماعاد لجهادك هناك دلايل *** راضى عليك الله باستشهادك
الموت حق والدنيا ثناها نايل *** لوكان فى سنين العمر ربى زادك
ياسى عمر ياما تشوف علايل *** الحرب بين ايطاليا واجنادك
واليوم فى بعضنا عاملين عمايل *** وحق من شرع فينا طريق جهادك
اتموت م النكد لو كان عمرك طايل *** شارون ياما داس دم اكبادك
وياما هتك مامن اعرض حلايل *** وجيوش العروبة ماليات بلادك
ما يوم دارن للخلاص وسايل *** وعرّج على موطن اجداد اجدادك
اللى فيه نور الحق دار شعايل *** وقول وين خطّابك ووين زيادك
ووين الصقور اللى عناهم طايل *** ووين خلفته عنتر ولد شدّادك
اللى فى سطور المجد يامو قايل *** وقول لعلى راهم اليوم احفادك
ان ما فزعت يبقوا لليهود ندايل *** الاسلام راه متصدع ايريد اسنادك
وايريد ياعلى فزعت نظاف شمايل *** وقول للرسول عروبتك وبلادك
ضاع حقها والحق فيها مايل *** بعد قلوبهم زاغت على ميرادك
زال عزهم تموّا اليوم عزايل *** بيجن خذا قدسك وداس امجادك
واسلام فى اسلام دمومها تسّايل *** واليوم يانبينا طالبين امدادك
وان غاب المدد راحت الناس دقايل *** ايام والعروبة تابعين ارشادك
وواخذين ما ناديت بيه دلايل *** فى اشبيليا طالت جيوش اولادك
حتى كان زالت ذكرها مو زايل *** وفتحوا ابواب غرناطة احفاد اعضادك
وسيف الشريعة ف المخالف عايل *** مازال فيها واضحات اسنادك
امجاد خالدة تحكى ان سال السايل *** وفى طليطلة ياما بنا شيّادك
وياما انحلّت صاعبات مسايل *** وياما تلو فيها عظيم اورادك
وياما انصاغت للحياة وسايل *** وفى قرطبة ياما زهو باعيادك
وياما علام الحق رفرف دايل *** وياما سعت فيها صفوف اجنادك
ان جا الفجر واذان الصلاة اشّايل *** وفوق ارض لشبونة مشوا روّادك
وكانوا على خوض البحور ولايل *** واليوم جيش يعرب فى ربوع بلادك
حتى رفح والجولان ماهو طايل *** وقول للجبل قيسك انسيت اجيادك
وهى ناسية والعهد قيسه طايل *** اللى من حوافرها ايذوب جمادك
وان ذكرها يصبح الغازى شايل *** اياما وهى رمزك ورمز افرادك
لا م البحر لا م السما اتخايل *** واليوم سايبة سيبة اكبار اجوادك
اللى قبل كانوا يردعوا ف المايل *** وانكان جت اوهام الشام فى مقصادك
نادى لها من فوق وانت جايل *** وقول طال ياجولان وقت اردادك
وما ريت من ناسك اللى متفايل *** وقول وين يالبنان وين امجادك
اصحاب العنا والصولجان الهايل *** فى مصيبتك تمّت الناس اضدادك
كيف العرب كيف اليهود مثايل *** لا اسمروا ليلة فى اصلاح بيادك
لا ردعوا باغى عن دروب رذايل *** اموالك اللى ضاعت وضاع افرادك
ودمك اللى فوق الشوارع سايل *** امسجلات ف التاريخ بين اسنادك
حقوق ثابتة ماهى ابقول القايل *** ان جت اتجيك بالشيعة وبعض اكرادك
وسيب العروبة ما عليها سايل *** اللى انقول صادق هى اسباب فسادك
رجاك لفزعها يا رجاك الطايل *** خلاّتك على غرة ايثوب رمادك
ونيران نسعر دايرات شعايل *** لا افزعت لا فكت حديد اصفادك
لا ردعت وان الكرب ميلة مايل *** اليوم كيفها ف الوصف كيف جرادك
لها فى فساد ارضك الباع الطايل *** خطّرها بعد قيسه سرح مجّادك
يا ادريس يامولى السريب الخايل *** نحنا اليوم خفية دايرين حدادك
بقلوب دامية وادموعنا تسّايل *** وطالبين م اللى فى جواره رادك
وهو كريم ما يرفض سوال السايل *** بلا حساب فى قبرك ايوسع زادك
ورضاه يشملك وتكون عطفه نايل *** وتصبح ورود وزعفران الحادك
وفراشك حرير ايوضبوة جدايل *** وايجى الروح والريحان فوق اوسادك
واتعيش فى حبا رضوان بين خمايل
الشاعر الكبير : معتوق الرقعي المغربي
ليست هناك تعليقات:
إرسال تعليق